Totenregister Öschelbronn 1623

Ist ein Sperwers-Eckhischer¹ Soldat mit Namen
Georg Grauer (sonnsten vonn den Soldaten
nur der Schüreguckhes gehaißen) von Sickhenhau-
sen² unnder Tüwingen³ am Neccer gelegen,^# unnd
folgenden Tag nachgesetzttermaßen begraben worden.
Junckher Fendrich Matthias Brandtmüller
kam vor dem Zusammen-Leutten mit Trommen
unnd Pfeiffen sampt der gantzen Compagni für ob-
ermeltt Hauß geruckt, und darvor, „daz Mitten
wir im Leben etcetera”⁴ cläglich schlagen und pfeiffen lassen.
Folgendts seindt die Musquetierer in der Ordnung voran
mit under sich gekerten unnd under den Armen gefaßten
Rohren gezogen, denen die Pickhanierer mit schleiffenden
Pickhen⁵ gefolgt. Darauff die Leicht in einer Baar
in Leinwatt eingenähet, von vieren Pickhanieren
uff 4 Pickhen getragen. Mitt solchem Procesß
fort uff den Kirchhoff, sie alldar nidergestellt. Biß
die Predigt verricht war (deren Text: Epistel⁶ Job,⁷ Capitel 7:
„Muß nit der Mensch immer im Streit sein“),⁸
hatt man nach gesprochenem ‚Vatter unser’ ein Salve
geschoßen, und als alles vollendet, widerumben
mit solchem Proceß vom Kirchhoff nach dem Gotts-
ackher etcetera. Vorher gienge[?] der Corporal mit under sich ge-
kertthen Hellpartten, darauf die Spil und sonsten
wie oben. Uff die Leicht Junckher Fendrich und ich,
der Pfarrer,⁹ drauff die Gmeind von Weib unnd
Mannen. Als er ein wenig eingeschärt, wurde vom
halben Theil der Musquatierer Feur ins Grab geben;
da das Grab halb gefült, vom andern halben Theil,
biß es schier gar eben von gesampten Hauffen, daz
man vor Rauch schier nichts gesehen kundt. Alls
alles vorüber, steckte der Corporal sein Hellparten
unnder sich ins Grab, kniete nider auffs Grab, umb in
herumben vorderst Junckher Fendrich, dann die ganntze
Compagni, und betteten heimlich ein ‚Vatter unser’. Drauff
sie samptlich gleichwol nit clagent wie vorhin, sondern
mit gewohnlichem Marschierstreich[?] wider abgezogen.

^# in Pangratij
Deichlers Hauß
allhier ge-
storben