Amt Neuenbürg an Herzog von Württemberg 1630

Durchleüchtiger hochgebornner Fürst,
Euer fürstliche Gnaden seyen unser underthenig gehorsamb
verpflicht schuldige Dienst eüßerstem Vermögens
jederzeit zuvor⁸.

Gnediger Fürst undt Herr. Verwichenen Sambstag
hat Schulthaiß zue Dobel Jeorg Welltz mir, dem
Obervogt, angefüegt, er seye berichtet, der jetzige
vermeindte⁹ Abt zue Herrenalb, Niclaus Brandt-
eißin, seye die Kürchen sambt selbigem Anhang
zue Dobel nechsten Tagen zue occupieren ge-
meindt¹⁰, weßen er sich nun zu verhalltten, mechte
er vonn mir vernemmen. Hierauff gedachtem
Schulthaißen angeditten worden, man wolle nit
hoffen, etwas de facto zue tentiren¹¹. Da eß auch
wider Hoffen beschehen, mieste man eß Euer fürstlichen Gnaden
so tags so nachts underthenig berichten unndt
fernern gnädigen Beschaidts gewerttig sein. Endtzwischen
aber wolle ich ihme auß dem Ambt etliche Muß-
quetierer, Gewalltthätigkheit zu verhüeten, weiln sich nur
acht im Closter befinden, verordnen,
welcher sich aber neben seiner Burgerschafft
mans gnueg zue sein. Auch allen incommoditalibus¹²
vorzusein verlautten. Solches also in seinem
Orth beruehen lassen. Nichts desto weniger
werden wür von dem Pfarrer undt Schultheißen
an jetzo berichtet, allß Jeorg Finckh von
Rothensohl – ein Filial, Herrenalber Ambts –
gestrigs Tages mit Todt abgangen, der Caplan selbigen
nacher Dobel alßbalden tragen, parentiren¹³ und
auff den Kürchhoff unwissendt deß Schultheißen
undt ganßer Burgerschafft ohn einigen Glocken-
straich begraben laßen. Neben dißem procedere¹⁴
hat auff vorhergehenden Abendt deß Abts Ab-
khündigung der Caplan gleichergestalt dem Pfarrer
zue offtbesagtem Dobel bey Kayßerlichen Mayestät höchster
Ungnadt sich der Kürchen zue bemießigen, selbige
auch sambt dem Pfarrhauß innerhalb
acht Tagen zue rohmen (quis nescimus fundamentis)¹⁵
mandirt¹⁶. Welcher sich auch deß Predigen undt der
Bettstundt (deme wür sonsten nichts zu befehlen,
aber unserm Bedunckhen nach nit gebillicht),
darumben abschrekhen lassen. Einweg alß
den andern aber ist die Kürchen noch under sein,
deß Pfarrers, Gewahrsame gesperrt. Gleich
wie nun angeregter Pfarrer zue Dobel solches
dem Speciali¹⁷ zue Willdtbad¹⁸ notificiert¹⁹, alß
wirdt ermelter Special unzweiffenlich dißes
auch underthenig berichtet, sich auch rebus sic
stantibus²⁰ nicht ex tempore²¹ (deme wür sonsten
nichts vorschreiben) resolvirt²² haben. Damit
aber Euer fürstliche Gnaden Jura observirt²³ unndt sovil
müglich in Acht genommen, ist endtzwischen viel-
besagtem Pfarrer zue Dobel, in Ansehung wür
mit dem geweßnen Apt zue Herrenalb
 – sich anjetzo alhie halltendt – communicirt²⁴,
wüder nacher Dobel zu verfügen. Weilen die Sontags-
predigt ihm auch abgeschreckht, morgen die
Predigt neben dem Gebett zu verrichten, sich auch
im geringsten mit den Herrenalbischen biß
auff weiter Verordnen einzuelassen, ange-
dütten²⁵ worden. Welches Euer fürstlichen Gnaden wür eyl-
fertig underthenig berichten undt deroselben
gnedige Resolution²⁶ erwartten, Euer fürstliche Gnaden
unß beneben , wie alwegen gehorsamblich be-
richten wollen. Datum den 27ten Septembris 1630.

Euer fürstlichen Gnaden

underthenig
gehorsam
verpflichte

Ober- undt Undervögt
zue Newenbürg

Jost Faber
Johan Friderich Mumprecht

---