Amt Maulbronn an Herzog von Württemberg 1632

Durchloichtiger hochgebohrner etcetera gnediger
Fürst unnd Herr. Uff Euer fürstliche Gnaden dieser Tagen
ergangenem gnedigen Bevelch, dieselb underthönig
zue berichten, wie es mit dem abgebrannten
Fleckhen Knittlingen hergangen, was
sowohl Euer fürstliche Gnaden alls die Inwohner-
schafft daselbsten an Früchten, Wein und
anderm für Schaden gelitten, auch wo der
Pfleger⁷ und sein Gesindt hin und wievil
Menschen in allem bei sollchem Tumult umbkommen
sein möchten etcetera, füegen Euer fürstlichen Gnaden
wir gehorsamlich zu vernehmen. Nachdem
das kayserliche Volckh under dem Commando
des Marggraven von Baaden⁸, Montecucculi
und Ossa verschinen⁹ Sontag, den 12ten
huius¹⁰, mit theils Compagnien, volgenden
Monntags aber mit der gantzen Armee von
8.000 Mann für die pfältzische
Statt Brettheim geruckht, das der darinn
gelegene schwedische Commandant, der
nur 130 Mann ungevähr starckh gewesen,
alls er sich keines Entsatz¹¹ gewiß zue ge-
trösten gehabt, sollche Statt mit Accord¹²
übergeben. Da dann, nachdem besagte
Obriste hinein kommen, der Burgerschafft
mit Niderhawen, uff Weib und Kinder
gethonen Fuesfall und beschehen inn-
stendiges Flehen, Bitten und Wainen
irer verschonnt, aber die Heußer gantz
außgeplündert unnd das Vihe hinweg nacher Brussel¹³
getriben wordenn. Nach solchem seyen sie, die Kayßerischen, noch selbigen Abendt
darauß gezogen unnd uf dem Veldt zwischen Haidels-
heim¹⁴ unnd Diedelßheim¹⁵ uber Nacht campiert.

Volgenden Dienstag zu Mittagszeit seyen ettliche Com-
pagnia wider inn Bretten hineingefallen und haben
der Statt drey Thor abgebrochen unnd verbrant, also
daß solche Statt noch der Zeit ganntz offen unnd meniglich
auß- unnd einwandlen kann.

Mittwochmorgens frie haben wir die Avisa¹⁶ bekhommen, das der Feindt sich
nacher Udenheim¹⁷ gewendet. Dahero wir verhofft, kein
Gevahr mehr vorhannden sein werde. Es ist aber dise
fallacia ¹⁸damit unndergeloffen, das der Feindt nur
das Fuoßvolckh (welches ohne Zweifel am Montag
zuvor ime vor Bretten zum Succurs¹⁹ zu khommen)
uf Philippsburg²⁰ zu marschieren lassen. Mit der gannzen
Cavallaria aber hat er sich Dienstag zu Nacht in denn
Waldt zwischen Bretten unnd Derdingen²¹, der Baurbacher²²
Waldt genant, begeben unnd sich darinnen am Mittwochs
Vormittags also still verhalten, das man deßhalb
kein gewisse Nachrichtung, ob ein Feindt darinn
oder wie starckh er sein mechte, haben können. Biß
nachmittags zwischen zwey unnd drey Uhr sich die
gannze Macht einsmahls uß solchem Waldt (der
ettwan drei Viertel Stundt vonn Knittlingen gelegen)
gethon unnd inn vollem Marsch gerad uf dißen Fleckhen
zugangen, solchen umbringt unnd erstlich durch einen
Trommeter uffordern lassen. Der darinnen gelegne
Commandant, welcher vonn obersten Wachtmeister deß
Rawischen Regiments²³, Michel vonn Grien²⁴, dahin com-
mandirt worden unnd sein, Grienen, Leuttenant geweßen,
so sich zuvil uf denn versprochenen Succurs verlassen,
hat sich resolvirt²⁵, mit seinen zwo bei sich habenden
Compagnia Lanndtvolckh biß uf denn letsten Mann
zu wehren. Derohalb die kayßerischen Tragoner alßbaldt

uf die Thor angesezt unnd solche leuchtlich
(weil die Unserigen mit Krautt unnd Loth²⁶ ubel versehen, auch wegen deß
lang ußbleibenden Succurs unnd hergegen der kayßerischen
grossen Macht unnd Furi schon gannz verzagt waren,
die Gewehr vonn sich wurffen unnd so guet sie konten
entlieffen) eröffnet. Da dann ein
Compagnia ettlich inn denn Fleckhen commandirt wurden,
welche alle Mannspersonen niderhawen solten. Die
Uberige haben rings umb denn Fleckhen auch uf denn Veldt
inn Strassen gehalten. Wann jemandt entrinnen wollen,
dennselben gleichfahls nidergemacht, thails gefangen (wie dann
der Special²⁷ auch uf dem Veldt ereilt unnd mit inen hinweg gefiehrt worden;
auch noch kein Wissenschafft enthalten, wo sie ine hingefüehrt,
der Diaconus aber ist entritten) zum Theils also beschedigt,
das sie nit weit mehr kommen kenden. Inn denn Pfleghof
haben sich vil Weibspersonen unnd Kinder begeben und vermeint
sicher zu sein. Welche uf eines darein gerittnen Obersten
Ankhunfft ein Fueßfall gethan unnd sovil erhalten,
daz sie eilendts uß dem Fleckhen gemiesst. Welchen ein
Trommeter zugeben unnd biß nacher Brettheim beglaittet
worden. Aber alle Mannspersonen, was sich nicht in der
Keltern unnd sonnsten versteckht, seindt nidergemacht
unnd gefangen. Entzwischen aber der Fleckh allent-
halben sowol inn- als usserhalb angesteckht worden, also das
derselb innerhalb zween Stunden – weil eben zugleich ein sehr grosser
ungewohnlicher Sturmwind und Regen eingefallen – im vollen Branndt
gestanden unnd biß nachts umb 12 Uhr (da allererst
der Kürchenthurn unnd Possthauß, welches die letste gewesen,
eingefallen) dieser gannze Fleckh zusambt dem Pfleghof
mit aller der Inwonerschafft Vahrnus²⁸ und Mobilen (dann wennig geblindert worden)

item allen eingethonen Winterfrüchten, Fütterung, theils
Vihe unnd Wein, was nit in dieffen Kellern gewesen,
inn die Aschen gelegt worden unnd nit mehr stehen bliben,
als die Mihlin²⁹ hinder dem Possthauß unnd vor
dem Underthor ein Brennhitten.³⁰

Was denn Pfleghoff belangt, ist derselb, wie gehört, gleichfals
ann Gebewen³¹ sambt denn eingethonen Zehendt-
früchten zugrundt gangen. Inn denn Kellern aber
alles gebliben, doch die Kellerthüren verbronnen, also
daz wir ann verschinen Freitag (seitemahl man wegen
der kayßerischen Straiffens³² unnd der grossen Hiz eher nit
inn Fleckhen kommen konnden) beede Keller gannz
offen, die Wein aber noch aller Jusst³³ befunden.
Welche ich, der Verwalther, alßbald, so guet man kondt,
mit Thilen³⁴ verschlagen lassen.
Daruff auch einen Closterdiener neben dem Seheknecht³⁵
unnd drey Zehendtknechten³⁶ zu Knittlingen bestelt, das sie
biß uf anderwertige Euer fürstliche Gnaden Verordnung oder bessere
Verwahrung unnd Verfertigung newer Thüren so tags,
so nachts darinnen hietten unnd niemanden daz Auß-
unnd Einlauffen unnd Verschlaiffen³⁷ deß Weins, welchs
schonn vonn heimischen unnd frembden Gemein, und schier
alles Preiß werden wöllen, gestatten sollen.

Inn obigem Tummult ist der gewesne Pfleger Jermias
Bolz (welcher zuvor sein Haußfraw mit 4 Dochtern
allwo geflehenet), wie unns die wider vonn Bretten
heruffkommende Weiber berichten, anfangs durch einen kayßerischen Officir
mit zwey Schüssen ubel verwundt unnd im Pfleghoff hin
unnd her geschleppt, nachgehendts aber von andern vollendtz
nidergehawen worden unnd bei der Zehendtscheuren
todt ligen gebliben. Dessen Leichnam volgends, nachdem gedachte
Scheuren abgebronnen, vonn dem abgefallenen Holtz und
Feur guetentheils verzehrt unnd
allein ein Theil seines Leibs noch gefunden, welcher vonn
unns in ein Bahr gelegt, alher inns Closter gefiehrt
unnd uf nechst khommenden Freitag zur Erden bestattet.
Auch dabei durch denn Vicarium alhie ein Leuchtpredig³⁸
gehalten werden solle. Sein Pflegers seeligen
Haußfraw ist verschinen Donnerstag mit dreien Dochtern von hier
hinweg, wie wir berichtet, nacher Stuettgardten³⁹

gefahren. Drey Sohn seindt inn wehrendem Tummult
gefangen. Doch die zwen alberait⁴⁰ wider mit 24
Thaler gelösst unnd zuruckhkommen. Von dem dritten unnd
jüngsten aber kan man nichts grundtlichs wissen.

Inmassen man auch ohne vorhin eingeholte Erkhundigung
unnd abgehende Ußschreiben inn daz Maulbronner, Lauffamer⁴¹, Bottwarer⁴²
unnd Beilsteiner⁴³ Ambt, welcher Ußschuss oder andere Wahl
zu Knittlingen gelegen, nit wissen kan, wievil Menschen
inn allem beileuffig umbkhommen unnd verbronnen sein, angesehen⁴⁴
vil so inn Heusern versteckht, allerst wann man raumen
würdt, gefunden werden mechten. Welches alles doch
sovil immer müglich fürderlich erkhundigt unnd gehöriger
Orthen unnderthönig berichtet werden solle.

Nachdem nun der Wein inn beeden Pflegkellern noch
allerdings just, auch wievil dessen noch ungevahrlich sein
mechte, uß deß Pflegers seeligen nechst uberschickhtem
Quarthalbericht zu erlernen sein würdt. Als hielten
wir inn Unnderthonigkheit rathsam sein, weil
sobaldt inn den Pfleghof kein Wonung zu zurichten, daz
ein Pfleger oder Kieffer fieglich sich darinnen betragen
kondte. Euer fürstliche Gnaden hetten solchen zugegen ligenden Wein
alhero inns Closter fiehren lassen. Was denn Habern⁴⁵,
so vonn dem Zehendten gefallen würdt und noch aller uff
dem Veldt stehet, betrifft, kann derselbig gar wol uff
denn Elffinger Hof⁴⁶ gefiehrt unnd alda ußgetroschen, auch
uber solches alles ordenliche Particularia⁴⁷ gehalten werden.
Wie dann auch der künfftige gefallende Zehendt- unnd
Kelterwein, weil gleichfals die Keltern abgebronnen
unnd sobaldt nit wider zu bawen, die Inwonerschafft
auch die Treber⁴⁸ uf gedachten Hof oder so im Frewden-

stein⁴⁹ zum Ußtheyen⁵⁰ werden fiehren miessen, gar wol inns Closter
gefiehrt werden kan. Welches jedoch alles zue
Euer fürstlicher Gnaden Belieben steht.

Enndtlichen, nachdem deß Raums unnd Bawens halb
ein hohe Notturfft einen Baw-
meister alhero zu verordnen, welcher mit uns
auch Schultheiß unnd Gericht sich vergleichen thette, wo der
Raum, dessen uberauß mechtig vil sein würdt, hin-
zufiehren, auch denn Augenschein im Pfleghof
eingenommen und welcher Gestalten derselbe wider also zuzurichten,
das ein Pfleger innskünfftig darinn wohnen, auch
die Zehendt- unnd Gülttfrüchten ufzubehalten,
sowol auch die Keltern zu erbawen
sein mechten. Als wollen Euer fürstliche Gnaden wir für uns auch in Namen der
armen verbrendten Leuth umb fürderliche Abordnung
eines Bawmeisters unnderthonig gebetten. Darneben
der zu bestendigen Gnaden unns hiemit wie allwegen
unnderthonig und gehorsamblich bevohlen haben. Datum
denn 21ten Augusti anno 1632.

Vogt
Verwalther

Bericht
wegen deß verbrenten Fleckhens
Knittlingen.